Akademik Aslan Aslanov Azərbaycanda fəlsəfə elminin görkəmli nümayəndələrindən idi. Onun təşəbbüsü ilə
Bakı Dövlət Universitetində "Estetika kafedrası" yaradıldı. O, uzun illər bu kafedranın rəhbəri vəzifəsində çalışdı.
Estetika sahəsində gənc alimlərin yetişməsinə xidmət göstərdi. O dövrdə qədim yunan filosofu Aristotelin "Poetika"
əsərini tərcümə etdi. Bundan başqa, fransız maarifçi mütəfəkkiri Didronun "Ramonun qardaşı oğlu" əsərini tərcümə etdi.
Aslan müəllim eyni zamanda nəğməkar şair kimi tanınırdı. Onun "Lalələr" şeirini böyük müğənnimiz Rəşid behbudov xüsusi 
məharətlə səsləndirirdi. 
  Poeziya sahəsində Tvardovskinin "Vasiliy Tyorkin" poemasını uğurla dilimizə çevirdi. Alman şairi Hötenin yaradıcılığından
parçalar tərcümə etdi.
  Aslan müəllim uzun müddət Azərbaycan Mədəniyyət və İncəsənət Universitetinin rektoru oldu. Akademiyanın Fəlsəfə İnstitutunun 
direktoru vəzifəsində çalışdı. 
  Aslan müəllim təbiətən xeyirxah ziyalı şəxsiyyət idi. Mən onun rektor olduğu Azərbaycan Mədəniyyət və İncəsənət İnstitutuna vaxtaşırı 
onunla görüşmək üçün gedirdim. Çox vaxt ona işi düşən adamlar mənə müraciət edirdilər. Onda deyirdim: "Mən xahişinizi yerə salmaq istəmirəm;
ancaq Allah eləsin ki, onun şair tərəfinə rast gələk". Onda Aslan müəllim həddən artıq mülayim olurdu. İnzibatçı kimi bəzən sərtliyi də var idi. Mən
onunla yaradıcılıq əməkdaşlığı edirdim. Ailəvi dost idik. Həyat yoldaşı Lena xanım qonaqsevər və mehriban qadın idi. 
  Aslan müəllim Ağstafada böyüdüyündən sazı-sözü çox sevirdi. Aşıq Kamandar ilə dost idi.
  Aslan müəllim haqqında xoş sözləri yetərin qədər davam etdirmək olar. Onun həmkarları arasında çoxlu xeyirxahları var. Bir sözlə Aslan Aslanov 
mehriban təbiətli Azərbaycan ziyalısı idi. Allah ona rəhmət eləsin!

Camal Mustafayev

Əməkdar elm xadimi, Professor, Fəlsəfə elmləri doktoru. 

                                                                                                        Mehriban Məmmədzadə