Fevralın 10-da İranın Azərbaycandakı səfirliyi ölkənin milli bayramı - İslam İnqilabının 37-ci ildönümü münasibətilə rəsmi qəbul təşkil edib

42-ciparalel.az-ın məlumatına görə, əvvəlcə füsunkar Qurani-Kərim ayələri tilavət olunub, daha sonra Azərbaycanın və İranın dövlət himnləri səsləndirilib.

Səfir Möhsün Pakayin İranın inqilabdan ötən 37 ildə keçdiyi inkişaf yolundan danışıb, bu illər ərzində müxtəlif sahələrdə böyük uğurlar əldə edildiyini vurğulayıb. O deyib ki, İran və Azərbaycan arasındakı konstruktiv əməkdaşlıq strateji əhəmiyyət daşıyır. Mövcud əlaqələrin daha da genişləndirilməsi ölkələrimizin qarşıya qoyduğu əsas məqsədlərdəndir. Son zamanlar iki ölkə arasında həyata keçirilən yüksək səviyyəli qarşılıqlı səfərlər, görüşlər əlaqələrimizin daha da genişlənməsinə təkan verib. Səfir vurğulayıb ki, İrana qarşı tətbiq edilmiş iqtisadi sanksiyaların aradan qaldırılması Azərbaycanla əməkdaşlığın daha da genişləndirilməsi üçün böyük imkan yaradıb.

Tədbirdə rəsmi şəxslər, Milli Məclisin deputatları, xarici ölkələrin Azərbaycandakı səfirləri, Azərbaycan hökumətinin nümayəndələri, QHT sədrləri, siyasətçi və politoloqlar, jurnalistlər, mədəniyyət və din xadimləri, o cümlədən QMİ-sədri Şeyxül İslam Allahşükür Paşazadə və ictimaiyyət nümayəndələri iştirak ediblər.

Energetika naziri Natiq Əliyev əlamətdar gün münasibətilə İran xalqını Azərbaycan hökuməti adından təbrik edib.

Azərbaycan-İran əlaqələrinin möhkəmləndiyini diqqətə çatdıran nazir ölkələrimiz arasında qədim tarixi köklərə əsaslanan qardaşlıq və dostluq münasibətlərinin olduğunu söyləyib. O, energetika, nəqliyyat və digər sahələrdə əlaqələrin inkişaf etdirilməsinin region üçün böyük əhəmiyyət kəsb etdiyini vurğulayıb.

Nazir deyib ki, Azərbaycanla İran arasında yüksək səviyyəli əməkdaşlıq regionda sülh və təhlükəsizliyin təmin edilməsinə böyük töhfə verir.

42-ciparalel.az