Şimali Kipr Türk Respublikası (ŞKTR) Türkiyə lirəsindən imtina edərək Avropa İttifaqınınpul vahidi olan avrodan istifadə edəcək. Bu məqsədlə adada texniki işlərə start verilib. Artıq Avropa İttifaqının ŞKTR-na gedən bir qrup mütəxəssis türk Kiprinin rəsmiləri ilə danışıqlara başlayıb. 

ŞKTR-da avroya keçişlə eyni zamanda Avropayla Gömrük İttifaqına keçiş prosesi də işləyəcək. Bu çərçivədə ŞKTR-da gömrük qanunvericiliyinin Aİ-yə uyğunlaşdırılması planlaşdırılır. 


ŞKTR prezidenti Mustafa Akıncı 

Kipr respublikasının 2004-cü ildə birtərəfli qaydada Avropa İttifaqına üzv olması səbəbilə, ŞKTR ilə əldə olunacaq razılaşmada başda müştərək pul vahidi, gömrük birliyi kimi iqtisadi səbəblər olmaqla tərəflər arasındakı bir çox mövzu Aİ-yə uyğunlaşdırılmalıdır. 

ŞKTR prezidenti Mustafa Akıncı müsahibəsində, ötən gün keçirilən liderlərin görüşündə iqtisadi harmonizasiya fəaliyyətlərinin aparılması üçün texniki heyət qurulmasına qərar verdiklərini deyib. Akıncı həmçinin hədəflərinin Avropa İttifaqından gələn mütəxəssislərlə ŞKTR-nın avroya keçiş hazırlıqlarını ən qısa müddətdə tamamlamaq olduğunu vurğulayıb. 

"Hazırlıqlar problemin həllinə istiqamətlənəcək. Razılaşmanın referendumla təsdiq olunmasından sonra ŞKTR-da 1 illiyinə avroya keçiş prosesi başlayacaq. Bu müddət ərzində Türkiyə lirəsi də qüvvədə olacaq. Avroya keçiş, gömrük birliyi və digər adaptasiya işləri üçün referendumun nəticələrini gözləməyə ehtiyac yoxdur. Bu bir prosesdir, avroya keçiş və gömrük birliyi ilk mərhələdir. Bundan sonra səhiyyə, ekologiya və s. məsələlərdə Aİ-yə adaptasiya prosesi gündəmə gələcək.” 


Kipr adası

Lirədən avroya keçiş məsələsinin texniki detallarının Türkiyə ilə də müzakirə olunaraq həyata keçiriləcəyini deyən Mustafa Akıncı gömrük qanunvericiliyini isə vaxt itirmədən dəyişdirərək "Yaşıl cizgi”ni (Şimali və Cənubi Kiprləri ayıran təmsili sərhəd) aradan qaldırmaq istədiklərini bildirib. 

Brüssel və Nyu York təmaslarında avroya keçiş və gömrük birliyi mövzularının gündəmə gəldiyini bildirən Akıncı avropalı rəsmilərin prosesi sürətləndirmək üçün söz verdiyini, bu məqsədlə xüsusi komitə qurulması üçün Kipr respublikası ilə razılaşma əldə olunduğunu qeyd edib.