Kimsəsiz uşaqlar mənzillə təmin olundu
42-ciparalel.az
Məzunların ev probleminə son qoyulub.
Uşaq müəssisələrində valideyn himayəsindən məhrum olan məzunların ev probleminə son qoyulub. 90 gənc yeni mənzillə təmin olunub. Dövlət uşaq müəssisələrində valideyn himayəsindən məhrum olmuş məzunlar üçün Masazırda inşa olunan "Məzun evi” Sosial Müəssəsi bu gün qapılarını istifadəçilərinin üzünə açıb.
Uşaq evini tərk etdikdən sonra kirayələrdə yaşamalı olan 90 gənc mənzilinə qovuşub. Dövlət tərfindən inşa olunan və hər bir avadanlıqla təchiz edilmiş bir otaqlı evlər məzunların daimi istifadəsinə verilib.
Dövlət sosial təminat xidmətinin rəisi Çingiz Əliyev deyir ki, bu 90 gəncin 67-si işləməyən, 23 isə işləyən məzundur: "Onlarda biri Neft Akademiyasında, 7-si isə peşə litseyində təhsil alır. Eyni zamanda 10 nəfər ailəlidir. Və hər birinin bir övladı var. Nizamnamədə göstərilir ki, əgər dövlət uşaq müəssisələrində valideyn himayəsindən məhrum olan məzunların müvafiq qaydada nigaha giribsə, o halda həmin mənzildə öz ailəsilə birlikdə yaşaya bilər”.
Elə Rzayevlər də cəmi bir ildir ki, ailə qurublar. Kirayədə yaşayan gənc ailə üçün bu mənzil isə göydən düşmüş kimi olub:
"Ailə həyatı qurmadan əvvəl yoldaşım Lənkəran uşaq evində qalıb. Evləndikdən sonra onunla birlikdə Lənkəranda kirayədə qalmağa başladıq. Nazirlik tərəfində bu xəbəri bizə verəndə, sevincək əşyalarımızı götürüb bura gəldik. Onlara öz təşəkkürümü bildiririk, sağ olsunlar”.
Subay gənclərin də gələcəkdə evlənib burada yaşaması üçün heç bir maneə yoxdur. 20 yaşlı Səkinə Məmmədova isə deyir ki, əvvəlcə iş sonra ailə:
"Bu vaxta qədər kirayədə qalırdıq. Biz dörd baçıyıq. Baçımın biri ailəlidir, daha iki baçım isə yanımda qalacaq, yəni üçümüz bir yerdə olacayıq”.
Qeyd edək ki, bu müəssisədə məzunlara ev verilməsi Təhsil Nazirliyinin hər tədris ilinin sonunda Əmək və Əhalinin Sosial Müdafiəsi Nazirliyinə göndərdiyi siyahı ilə müəyyənləşir.
Həmin siyahıda adları olan məzunlar şəxsiyyətlərini təsdiq edən sənədlə "Məzun evi” Sosial Müəssəsinin rəhbərinə müraciət edir. Onlar da müvafiq sənədlərə baxaraq məzunların bu evlə təmin olunmasın həll edirlər.
Bundan başqa müəssisəyə qəbul olarkən sağlamlıq haqqında arayış da tələb olunur.
Odur ki, bu həyətdə bu tipli hələ iki bina da inşa olunacaq. Artıq belə binalardan birinin inşasına başlanılıb.