Silahlar zibillikdən aşkarlanıb. Nardaran yenidən gündəmə gəlib. Daxili İşlər Nazirliyinin mətbuat xidmətindən məlumata görə, qəsəbədə yenidən silah sursat aşkarlanıb. Məlumata görə, polis əməkdaşları tərəfindən 1 ədəd "Makarov” tipli tapança, 1 ədəd "Vinçester” markalı tüfəng və 13 ədəd patron tapılıb. Silah sursat Sabunçu rayonunun Nardaran qəsəbəsində məişət tullantıları yığılmış yerdən aşkar edilib. Azərbaycan Respublikasında ictimai-siyasi sabitliyi pozmağı, təxribatlar, kütləvi iğtişaşlar, terror aktları, bütövlükdə konstitusiya quruluşunu dəyişdirməklə şəriət qanunları ilə idarə olunan dini dövlətin yaradılmasını planlaşdıran silahlı cinayətkar dəstənin zərərsizləşdirilməsi üzrə noyabrın 26-da Daxili İşlər Nazirliyi tərəfindən Bakı şəhərinin Nardaran qəsəbəsində xüsusi əməliyyat keçirilib. Əməliyyat zamanı polis əməkdaşlarına silahlı müqavimət göstərmiş cinayətkar dəstənin 4 üzvü məhv edilib, daha bir neçə nəfəri yaralanıb. Xidməti vəzifələrini sonadək mərdliklə yerinə yetirən polis sercantları Vüqar Nəsibov və İsmayıl Tağıyev qəhrəmancasına həlak olub.